Me zemër plot emocion, krenari dhe dashuri për traditën shqiptare, Ansambli “Ibe Palikuqi” përjetoi një tjetër moment të paharruar në manifestimin e 17-të të lojërave popullore boshnjake “SBONI 2026”, të mbajtur në Novi Pazar.
Në skenën e këtij festivali ndërkombëtar u soll shpirti i kulturës sonë përmes interpretimit madhështor të Valles së Tropojës dhe Valles së Mozaikut, duke përcjellë emocione të forta tek çdo i pranishëm. Çdo hap i valltarëve, çdo tingull i muzikës dhe çdo duartrokitje e publikut ishte një dëshmi e gjallë e dashurisë për traditën dhe identitetin tonë kombëtar.
Atmosfera u bë edhe më e veçantë me defilenë madhështore, ku ngjyrat, buzëqeshjet dhe energjia e ansamblit kthyen këtë pjesëmarrje në një kujtim që do të mbetet gjatë në zemrat e të gjithëve.
Ky sukses dhe kjo mirënjohje janë rezultat i përkushtimit, sakrificës dhe punës së palodhshme të çdo anëtari të ansamblit, të cilët me shpirt e zemër vazhdojnë ta promovojnë kulturën shqiptare në skena ndërkombëtare.
“Faleminderit të gjithë atyre që ishin pjesë e këtij rrugëtimi të bukur. Krenaria që ndjemë në Novi Pazar do të mbetet një motivim i madh për të vazhduar edhe më fuqishëm rrugën tonë artistike”, thuhet nga ansambli.