Tulsi Gabbard është një nga figurat më të pazakonshme dhe më kontroverse në politikën amerikane të viteve të fundit. Nga kongresmene demokrate nga Havai, veterane ushtarake dhe kandidate për presidente, ajo përfundoi në administratën e Donald Trump si drejtore e Inteligjencës Kombëtare të SHBA-së.
Së fundmi, Gabbard dha dorëheqje nga posti i saj, duke sqaruar se bashkëshorti i saj, Abraham Williams, është diagnostikuar me një formë të rrallë të kancerit të eshtrave dhe se ajo dëshiron të fokusohet tek familja gjatë trajtimit të tij.
E lindur në Samoa Amerikane dhe e rritur në Havai, Gabbard shërbeu në Gardën Kombëtare dhe u dislokua në Irak. Pikërisht përvoja ushtarake ndikoi fuqishëm në profilin e saj politik, duke e bërë të njohur si politikane me qëndrime të forta kundër luftërave dhe ndërhyrjeve ushtarake amerikane jashtë vendit.
Ajo hyri në Kongres si përfaqësuese demokrate e Havait në vitin 2013 dhe u bë hinduistja e parë dhe amerikania e parë me origjinë samoane e zgjedhur në Dhomën e Përfaqësuesve.
Karriera e saj politike fillimisht u zhvillua brenda Partisë Demokratike. Në vitin 2020 ajo kandidoi për nominimin presidencial demokrat, duke ndërtuar fushatën mbi kritikat ndaj ndërhyrjeve ushtarake amerikane, veçanërisht në Lindjen e Mesme, dhe duke kërkuar fundin e “luftërave për ndryshim regjimesh”.
Megjithatë, pikërisht këto qëndrime e kthyen në një figurë shumë të diskutueshme në Uashington. Gabbard u kritikua ashpër për takimin me presidentin sirian Bashar al-Assad në vitin 2017, si dhe për deklaratat e saj lidhur me Ukrainën dhe Rusinë, të cilat kritikët i konsideronin shumë pranë retorikës ruse. Ajo i hodhi poshtë këto akuza, duke insistuar se pozicionet e saj ishin kundër luftës dhe jo pro-ruse.
Në vitin 2022, Gabbard u largua nga Partia Demokratike, duke e akuzuar atë se ishte bërë elitiste, ideologjikisht e mbyllur dhe tepër e orientuar drejt politikave ushtarake. Pas kësaj, ajo iu afrua qarqeve konservatore, u shfaq shpesh në Fox News dhe mbështeti kandidatët republikanë.
Në zgjedhjet e vitit 2024 ajo mbështeti Trumpin dhe iu bashkua Partisë Republikane. Më pas, Trump e emëroi drejtore të Inteligjencës Kombëtare, pozitë që koordinon 18 agjenci amerikane të inteligjencës.
Konfirmimi i saj në Senat në shkurt të vitit 2025 kaloi me diferencë të ngushtë, pasi edhe disa republikanë shprehën dyshime nëse ajo kishte përvojën e nevojshme për një post kaq të ndjeshëm.
Mandati i saj në krye të inteligjencës amerikane u karakterizua nga tensione dhe polemika. Ajo premtoi depolitizim dhe reforma në shërbimet e inteligjencës, por mediat amerikane raportuan për përplasje të shpeshta me Shtëpinë e Bardhë, veçanërisht rreth politikës ndaj Iranit.
Kritikët e akuzonin se po përdorte pozitën për tema politike të afërta me Trumpin, ndërsa mbështetësit e saj e paraqisnin si zë kundër asaj që ata e quajnë “shteti i thellë”.
Dorëheqja e saj hyn në fuqi më 30 qershor 2026, ndërsa Trump njoftoi se zëvendësi i saj, Aaron Lucas, do të jetë ushtrues detyre i drejtorit.
Historia e Tulsi Gabbard mbetet një nga transformimet më të pazakonta në politikën moderne amerikane – nga një figurë progresiste kundër luftës deri në majat e aparatit të inteligjencës së një administrate konservatore.