Presidenti i Ukrainës, Volodymyr Zelensky, bëri të ditur se forcat speciale ukrainase kanë ndërmarrë një sulm ndaj selisë së FSB-së, shërbimit rus të inteligjencës dhe sigurisë së brendshme, në zonën e rajonit të Khersonit që kontrollohet nga Moska.
Sipas presidentit ukrainas, gjatë këtij operacioni është shkatërruar edhe një sistem rus i mbrojtjes ajrore Pantsir-S1. Në një postim në rrjetin social X, Zelensky publikoi pamje nga sulmi dhe theksoi se aksioni i ka shkaktuar humbje të mëdha ushtrisë ruse.
“Falë këtij operacioni të vetëm, humbjet ruse arrijnë në rreth njëqind të vrarë dhe të plagosur”, deklaroi Zelensky.
Ai nënvizoi gjithashtu se Rusia duhet të përballet me presion për t’i dhënë fund luftës, duke paralajmëruar se sulmet dhe “sanksionet” afatmesme e afatgjata të Ukrainës ndaj objektivave ruse do të vijojnë.
“Rusët duhet të ndiejnë nevojën për t’i dhënë fund kësaj lufte. ‘Sanksionet’ afatmesme dhe afatgjata të vendosura nga Ukraina do të vazhdojnë të funksionojnë”, u shpreh presidenti ukrainas, duke iu referuar operacioneve të fundit të forcave të armatosura të Kievit.
Luftimet në rajonin e Khersonit kanë vazhduar prej muajsh, pasi zona mbetet një nga pikat më të nxehta të përplasjes mes forcave ukrainase dhe atyre ruse. Ukraina ka intensifikuar sulmet ndaj objektivave ushtarake dhe logjistike ruse në territoret e pushtuara, me synimin për të dobësuar kapacitetet operative të Moskës.