Presidenti i përkohshëm i Sirisë, Ahmed al-Sharaa, ka njoftuar një seri ndryshimesh në qeveri, përfshirë zëvendësimin e vëllait të tij nga posti i shefit të zyrës presidenciale, raportoi agjencia shtetërore e lajmeve SANA.
Al-Sharaa emëroi ish-guvernatorin e Homsit, Abdul Rahman Badreddine al-Aama, si sekretar të përgjithshëm të presidencës. Ky vendim shihet si përgjigje ndaj akuzave për nepotizëm, pasi më herët këtë post e mbante vëllai i tij, Maher al-Sharaa.
Riorganizimi i së shtunës ishte i pari që nga rrëzimi i presidentit Bashar al-Assad në dhjetor 2024 dhe vjen rreth një vit e gjysmë pas fillimit të periudhës tranzitore pesëvjeçare të përcaktuar në deklaratën kushtetuese të Sirisë.
Sipas raportit, me dekrete presidenciale u emërua Khaled Zaarour si ministër i Informacionit, duke zëvendësuar Hamza Mustafan, i cili u transferua në Ministrinë e Punëve të Jashtme. Ndërkohë, Bassel Sweidan, që drejtonte një komitet për arritjen e marrëveshjeve me biznesmenë të lidhur me elitën e epokës së Assadit, u emërua ministër i Bujqësisë.
Gjithashtu, u zëvendësuan guvernatorët e provincave Homs, Quneitra dhe Deir ez-Zor – rajon lindor ku ndodhen shumica e fushave të naftës të Sirisë.
Al-Sharaa mori drejtimin e një vendi me institucione të dobësuara pas dekadash sundimi autoritar dhe një lufte 13-vjeçare që e shkatërroi shtetin.
Ai ka tentuar të ndërtojë një qeveri me figura të afërta nga e ashtuquajtura Qeveri e Shpëtimit të Sirisë, e cila administronte provincën opozitare Idlib, me qëllim rindërtimin e strukturave shtetërore dhe ekonomisë.
Nuk është dhënë ndonjë arsye zyrtare për riorganizimin, por analistët theksojnë se ai vjen pas kritikave për përqendrim të pushtetit te rrethi i ngushtë i presidentit.
Sipas analistit Nanar Hawach nga International Crisis Group, ndryshimet janë më shumë një rikalibrim i rrethit të brendshëm të al-Sharaa-s sesa një zgjerim i tij. Ai theksoi se largimi i vëllait të presidentit adreson akuzat më të dukshme për nepotizëm, por shumica e emërimeve të reja mbeten nga rrethi i tij i besuar.
Po ashtu, në muajt e fundit në Siri kanë shpërthyer protesta dhe fushata në rrjete sociale për shkak të përkeqësimit të kushteve ekonomike dhe kritikave për qeverisje të dobët.
Përveç riorganizimit qeveritar, autoritetet siriane kanë nisur edhe gjykime ndaj zyrtarëve të epokës së Assadit, si pjesë e procesit të drejtësisë tranzitore pas luftës 14-vjeçare, ku rreth gjysmë milioni njerëz humbën jetën.
Në Damask kanë filluar procese gjyqësore ndaj ish-zyrtarëve të lartë të sigurisë, të akuzuar për krime kundër civilëve gjatë kryengritjes së vitit 2011 dhe më pas gjatë luftës civile.