Dy çanta luksoze të markës Hermès, të sekuestruara nga biznesmenia e burgosur vietnameze, Truong My Lan, janë shitur për më shumë se 535 mijë dollarë në një ankand shtetëror në Ho Chi Minh City.
Sipas mediave ndërkombëtare, të dyja çantat “Birkin” gjetën blerës brenda vetëm 30 minutash. Njëra prej tyre, një model i bardhë “Birkin 25” i zbukuruar me gurë dekorativë në kapëse dhe anësore, u shit për rreth 440 mijë dollarë, ndërsa çanta tjetër “Birkin 30” arriti vlerën afro 95 mijë dollarë.
Truong My Lan po vuan një dënim të përjetshëm për një nga skandalet më të mëdha financiare në historinë e Vietnamit. Fillimisht ajo ishte dënuar me vdekje në vitin 2024, pasi u shpall fajtore për kontroll të fshehtë të Bankës Tregtare të Saigonit dhe për përvetësimin e miliarda dollarëve përmes një rrjeti kompanish fantazmë. Dënimi iu konvertua më pas në burgim të përjetshëm, pasi Vietnami hoqi dënimin me vdekje për disa kategori veprash penale.
Gjatë procesit gjyqësor, Truong My Lan kishte kërkuar që çantat të mos konfiskoheshin, duke deklaruar se dëshironte t’ua linte si kujtim fëmijëve dhe nipërve të saj. Sipas saj, njëra çantë ishte blerë në Itali, ndërsa tjetra ishte dhuratë nga një biznesmen malajzian.
Ekspertët e tregut të luksit thonë se çantat “Birkin” janë kthyer prej vitesh në objekte investimi, falë prodhimit të kufizuar dhe kërkesës së lartë globale.
Sotheby’s kishte shitur në vitin 2025 çantën origjinale “Birkin” për më shumë se 10 milionë dollarë, duke vendosur rekord si çanta më e shtrenjtë e shitur ndonjëherë në ankand.