Baritoni dhe solisti i parë i National Opera and Ballet of North Macedonia, Riste Velkov, është një nga katër personat që humbën jetën mbrëmë në aksidentin e rëndë trafiku në unazën e Shkupit.
Sipas informacioneve të publikuara nga Ministria e Punëve të Brendshme, aksidenti ka ndodhur rreth orës 23:00, në segmentin mes mbikalimit të Vizbegovës dhe nyjës së Mirkovcit. Një kamion i tipit “MAN” me targa të Kosovës, i drejtuar nga një shtetas 76-vjeçar nga Kosova, ka humbur kontrollin dhe ka kaluar në korsinë e kundërt, ku është përplasur me një veturë “BMW” me targa të Shkupit, të drejtuar nga Velkov.
Pas përplasjes, të dy automjetet janë përfshirë nga flakët dhe janë djegur pothuajse tërësisht. Ekipet zjarrfikëse të Shkupit kanë ndërhyrë për shuarjen e zjarrit.
Në vendngjarje kanë humbur jetën Riste Velkov (51), si dhe bashkëudhëtarët A. V. (20), P. M. (20) dhe një person tjetër identiteti i të cilit ende nuk është konfirmuar. Mjekët e Ndihmës së Shpejtë kanë konstatuar vdekjen, ndërsa trupat janë dërguar për obduksion me urdhër të prokurorit publik.
Shoferi i kamionit është arrestuar dhe ndodhet në stacion policor deri në zbardhjen e plotë të rastit.
Riste Velkov, i lindur në Shkup në vitin 1975, ishte një nga emrat më të njohur të skenës operistike në Maqedoninë e Veriut. Si solist i njohur i Operës dhe Baletit Kombëtar, ai interpretoi role të shumta kryesore në opera të njohura si Nabucco, Rigoletto, Macbeth dhe La Traviata. Ai vlerësohej për zërin e tij karakteristik dhe interpretimet në stilin bel canto.